شعب مثقف و رومانسي

مذكرات جيفرسون



17/10/2008



شعب مثقف و رومانسي



يوم من الأيام كنت مسافر من طهران الى الكويت

على متن طائرة الخطوط الجوية الكويتية



الطيارة مازالت في المطار وناطرين ركاب الدرجة الاولى يدخلون اول

في هذه الأثناء شافني واحد من الربع
شافني قاعد مع ركاب الدرجة 1000



قالي ها جيفرسون شتسوي بطهران؟

قلت له سلامتك سياحه



قالي قوم قوم تعال معانا

قمت ودخلني في كابينة الدرجة الاولى

شغل عدل

عطوني عصير

ولووز

وفوطه حاره

وجرايد

ودخلوا الركاب كلهم

وبعد شوي دخل وراهم وزير التربية و جم صحفي معاه

الوزير قعد يمي

ويابوله فوطه حاره ما خذاها

اي شيبي فيها ريحت البخور فايحه منه كأنه معرس

يابوله عصير ما خذاه

اي شعليه متريق عدل مو مثلنا من فجر الله ندور تكسي

واحد من الصحافيين سأله سؤال:

سعادة الوزير: في نهاية رحلتك هذه ما هو انطباعك عن الشعب الإيراني؟

رد الوزير: الشعب الإيراني شعب مثقف و رومانسي

راحوا الصحفيين ، صكوا باب الطياره، طارة الطياره

بس طول الوقت انا كنت افكر اشمعنى قال شعب مثقف ورمانسي؟؟؟؟؟

قلت له: سعادة الوزير ممكن سؤال؟

قال الأخ كويتي؟ لا عبالي انجليزي تصدق.

قلت له: لا كويتي، معاك جيفرسون عندي مدونه اكتب فيها و اسوي دروس نموذجيه للأبلات بعد وعندي شهادة اي سي دي ال

الوزير: اي اي اي ها اي خير آمر شبقيت تسأل؟

قلت له: اشمعنا قلت الشعب الايراني شعب مثقف و رومانسي؟

قال شوف يا جيفرسون: انا لما ازور اي دولة اشيك فيها على شغلتين، من هالشغلتين اعرف نوع الشعب

انا شفت شوارع طهران متروسه مكتبات و الناس تشتري فعرفت ان الشعب الايراني شعب مثقف

وشفت شوارع طهران متروسة بمحلات الزهور فعرفت ان الشعب الايراني شعب رومانسي

قلت له هاااااااااااااااااا

قلت له سعادة الوزير ممكن اذكر هذا الحديث في مذكراتي

قال اي عادي

ولا شوي ياي وحد مصك لابس بدله سوده

قال لي معاك امن الطائرة، ممكن اشوف البوردينغ؟

عطيته البوردينغ، شافه قال لو سمحت قوم وامش جدامي يالله

ووداني آخر شي يم الحمامات

وقعدني يم واحد ايراني

وجهي صار حمر اصفر اخضر من الفشله

سألت الايراني انت مثقف؟

رد وقال: جيمخيه؟

سألته انت رومانسي؟

رد : بابا جيمخي شما جيبوقو؟

حطيت المخده على راسي وخليتها لما وصلنا الكويت


مع تحيات جيفرسون
لعلي رسمت الابتسامة على شفاه احد