مذكرات جيفرسون
علاج البدليات
10/10/2008
حبيت أتريق ذات يوم
ورحت كوستا كوفي إلي في المارينا كريسنت
طلبت لي موكا بالكريمه و الفانيلا والصمونه يبتها من البيت مسويتها الخدامه
وقعدت مجابل العامود إلي فيه الجرايد
موصيني إذا رحت اي مكان عيونك لا تتلاقف مني مناك اقعد عاجل وغض البصر
امري لله جابلت العامود
فتحت الاب توب وشبكت على المسنجر
العادة من أشبك يشبكون معاي 3 ومرات 4 من الربع
بس هلمره صخه ما كو احد كلهم اوف لاين
نطرت شوي
خلصت كريمة الموكا شفتها شفاط
مليت
ما كو أحد
يااااااااااااا شلسالفه
قلت خل أشيك لايكون حاطيني بلوك
شيكت وإلا التعابه كلهم وبدون استثناء حاطيني بلوك
بس على منو
دخلت عليهم واحد واحد وزفيتهم
أثاريهم مسوين اضراب علي
ليش يبا
مو دافع رواتبكم
لا
مقصر وياكم
لا
بايق حلالكم
لا
تبون شي من الجمعية
لا
إي لييييييييييييييش الاضراب؟
واحد منهم تجرء وقال
يبا انت مفشلنا وكل تقط بدليات
ملاحظة: "بدليات هي كلمة كويتية تعني اطلاق اسم شيء على شيء آخر ومثال على ذلك بدل لا
تقول "يا شاطر" تقول يا ساطر"
آنه؟
اي انت
عييييجب انا اقط بدليات
قلت له ما عليه العتب على النظر بس ولا يخمك بسوي عمليت ليزك واريحكم
رد وقال ولا مو عاجبه
يبا العيب مو بعيونك يا الحول
العيب في اصابعك عجزنا ونعلم فيك
اصابعي؟
ايه اصابعك
لازم تطقطقهم باليوم مرتين
مره الصبح قبل لا تدخل الحمام
ومره قبل لا تنام
وتروح منك البدليات وترتاح ونرتاح من بدلياتك
واذا مو مصدق اتصل على فوزية الدريع واسألها
قلت له لا بروح مشهد بسوي عملية ليزك حق أصابعي
ملاحظة: "مشهد هي مدينة ايرانية سياحية دينية تشتهر بوجود عدد من الاطباء في مجال تجميل الخشوم و تصحيح العيون"
قال بتروح مشهد هااااا!
اي يبا مشهد شفيها مشهد بععععد ؟
لا ولا شي
لا قول شفيها؟
لا سلامتك
قال اقدر اروح وياك؟
ليش شفيك شنك البخت؟ لا بدليات ولا شي
شوي ولا الثاني قال انا بعد بروح وياكم وشبك الثالث وقال انا بعد
ليش بتروحون؟ انا اقط بدليات وبعالج روحي انتو شكو؟
قالوا كلهم وبصوت واحد:
عشان نطقطق لك أصابعك
تطقطقون أصابعي ها
انا بروح مشهد وبروحي
وبسوي عملية ليزك
حق عيوني
وحق اصابعي
وحق خشمي مره وحده
ملاحظة: "تركت بعض الكلمات كما هي بدون تصحيح وهذا دليل على صدق كلامهم بخصوص البدليات"
مع تحيات جيفرسون
لعلي رسمت الابتسامة على شفاه أحد
جميع الحقوق محفوظة ©
مع تحيات جيفرسون
لعلي رسمت الابتسامة على شفاه أحد
جميع الحقوق محفوظة ©
هناك ٤ تعليقات:
احنا الكويتيين لساننا ما يلحق على افكارنا حارين ونبي نتكلم كلام ٤ اشخاص من لسان واحد فلازم بدليات
P:
بس اشلون اتشيك على الناس اللي مسوين لك بلوك؟
هههههههههه
لي اول تعليق في المدونة عدل؟ ياسلاااام دخلنا التاريخ هههههههه
بالتوفيق نايس وورك
شكرا لمرروك الكريم
فعلا اول تعليق
وادخلت السرور على قلبي
لأني ادخلت الابتسامة
على شفتيك
بس لا تقطع
بس اشلون اتشيك على الناس اللي مسوين لك بلوك؟
هااااا
تدخلين على قائمة الاشخاص الي مشتركين معاج
ورايت كلك على الاسم
تطلع قائمة
اذا كلمة مسح (دليت)غير فعاله يعني مسوين عليج بلوك والعكس صحيح.
وشكرا للمشاركة
إرسال تعليق