جزن الشفت رابص

مذكرات جيفرسون

جزن الشفت رابص

6/10/2008

كنت رايح وكعادتي الى مطعم ومقهى شاي ونعناع،

ما غيره يم قصر السيف العامر.

مطعم هادي ومريح واضوائه خافته وما فيه خمه

قاعد بره وحاط اللاب توب وشابك مع الربع وبجانبي قدح من الكباتشينو .

شوي ولا النقال يرن واذا به واحد من الربع

قال لي بروح ديوانية الاهل بس ماعندي سيارة توصلني وتجي معاي

الديوانية بدل قعدتك بهالقهاوي إلي ما منها فايده؟

قلت له لايكون ديوانيتكم محفوفه؟ قال لا حياك

قلت يالله شوي وأمرك .......

مريته ورحنا الديوانية صفيت الموتر عند الباب ودخلنا

ولا كلهم شباب مثلكم وشرواكم

سلمت عليهم واحد واحد وقعدت يم رفيجي

شوي ولا داخل واحد مصك شان يقول:

هذا الموتر الي واقف عند الباب من له؟

شان يردون عليه "جزن الشفت رابص"

همست حق رفيجي: شيقولون هذوله؟ قال لي جزن

يا شسالفه

شان يلف ويهه علي المصك وقال لي ما شاء الله موترك خشف

قلت له مشكور وهمست برفيجي : شنو خشف قال لي جزن

انزين اشلون عرف انه موتري؟ هم جزن

يا ضعنا

قلت حق رفيجي يالله خل اروح قال يالله على راحتك

قمت وقلت لهم يالله يا جماعه استأذن مع السلامه

ردو كلهم وين تو الناس بعد شوي ياي المنقار

قلت حق رفيجي هم أجزن؟ قال جزن

قلت لهم مشكورين واذا ييه المنقار سلموا عليه، ضحكوا وقالوا يوصل يوصل

شيطلع هذا المنقار امممم يمكن راعي الديوانية ما أدري

طلعت و كلي حيره .....شقاعد يقولون هذوله؟؟؟؟؟

رحت البيت وشبكت وقمت ادور على معاني لهذه الطلاسم

واكتشفت معنى كلمة واحدة وهي "جزن"

يقول معجم اكسفورد لمعاني المفردات الغريبة ان كلمة "جزن"تعني اسكت هي كلمة

يستخدمها الصاغة في الكويت

وهم ما يسمون بالحساوية وهي من الكلمات المشفرة الدارجة بينهم لكي لا يفهم

حديثهم الغرباء

الحين انا ابي اعرف معاني باجي الكلمات ورفيجي ما فيه خير مو راضي يعلمني

يا ترى هل يمكن الاستعانة بكم؟

جزن وعرفناها

بس: الشفت، رابص، خشف، منقار، وبعد شنه قالوا خله يكسع،... وواحد قال الشفت أوهيص

يالله من يساعدنيييي،،،، وخصوصا على اوهيص

مع تحيات جيفرسون

لعلي رسمت الابتسامة على شفاه أحد