دكتور بس سمااااج

في مجمع 360 كنت قاعد
ماشاء الله المكان ملياااااااااااااان على الآخر
والكل قاعد يسولف مع اللي معاه

طبعا ما كنت قاعد اتسمع ولا كنت ناوي اتسمع على احد
واتوقع الكل كان يسولف عن امور متعلقة بالحياة
فمثلا البنات اللي هناك كان كلامهم عن المعرض المقام في ارض المعارض
الشباب اللي هناك كان كلامهم عن سياكل هارلي
وهذاك قاعد مع على ما اعتقد زوجته وقاعد يساسرها عدال عدال وكل ما قط عليها حرف واحد تشوف الابتسامة الشقاقية
الظاهر توهم معاريس الله يهنيهم

المهم الكل كان يسولف وهذا امر طبيعي
بس اللي لفت انتباهي الطاوله اللي يمي

كانوا مجموعه من الدكاتره (اطباء)
وكانت سوالفهم كلها عن المرضى
ذاك اليوم ياني البيشنت وكان عنده اف ار سي وسويتله ام آر أي .............
الثاني يقول شخبار مريضك اللي قولونه .....
وكانت سواااالفهم كلها بس عن المرضى
مره تلوع جبدي ومره اضحك ومره اتعلم
من الاشياء اللي تعلمتها ان حبوب البيبي اسبرين تخلي الدم يسيل ولما تصير عملية ما يوقف النزيف بسببها

بس الدكتور اللي ختمها وخلاني اقص بالبلوبيري كيك كان فصله

سلمكم الله يقول
ياني مريض ولا مسكين على طول يهرهر
يهرهر حق اللي ما يعرف يعني تكرمون على طول يخرج لا اراديا
يقول طليت فحصت مني مناك ولا شلقيت؟
طبعا هذا كله كان كلام الدكتور
يقول ولا اللقالك شوكة سمكه متغلغصة بالمستقيم
اهو قال متغلغصة بالمستقيييييييم
انا شرقت
فصلت
قمت اطق على الطاوله
شنو هذا عادي عندهم
تقول واحد من الدكاتره ضحك
كلللللللللش عااااادي عندهم

اشوه اشوه لي الحين ماكو دكتور سوى مدونه لي الحين اشووووووه
جان الحين الفضايح مالها تالي

مع تحيات جيفرسون
لعلي رسمت الابتسامة على شفاه احد
وآسف على الانقطاعش

هل مرض اتفلونزا الخنازير حقيقة ام خدعة كبرى؟

في كل المجالات العلمية يوجد ما يسمى بالمراجع العلمية
فعلى سبيل المثال في الهندسة يوجد standard
هذا المرجع يستعمله المهندس كمعيار موثوق فيه عند تصميم اي مشروع
المهندس يثق ثقة عمياء بهذا المرجع الذي قام بوضعه ومراجعته مهندسون ذو
باع طويل وخبره عريقة بالهندسة.

وهكذا الحال في مجال الطيران والطب وغيرها من العلوم.

ولكن هل هذه حقيقة؟ هل من نثق بهم هم فعلا اهلا للثقه؟
هل اصبحت العلوم في ايدي غير امينه تستغل من خلال جماعات سرية؟
هل التنويم المغاطيسي والبرمجة العقلية هم ادوات ظاهرها خدمة البشر وباطنها التحكم في عقولهم؟

في السبعينات من هذا العصر عرض فلم علمي يبن كيفية التحكم في مشاعر قطه
هذه القطه وضع على رأسها جهاز واللذي من خلاله يتم التحكم بها عن بعد، هذا في السبعينات ها

وياترى وين وصل العلم اليوم؟

شاهدت هذا المقطع على اليوتيوب والله اعلم هل هو حقيقة ام تشائم

الكاتب يقول ان جهاز التحكم في الانسان عن بعد بلغ من الصغر حتى وصل بحجم رأس شعرة
ويمكن الآن زرعه في الانسان من خلال حقن المصل المضاد لانفلونزا الخنازير!!!!!!!!!!!

انا وضعت الخبر في دائرة الامكان وانت عطني رأيك بالموضوع
5 حلقات على اليوتيوب تشرح وجهة نظر في هذا الموضوع:

http://www.youtube.com/watch?v=-9WVPgmrvzw


مع تحيات جيفرسون
لعلي رسمت الابتسامة على شفاه احد غير مصاب بانفلونزا الخنازير

ماكو كريسمس هالعام، يلا عاد

قرار وضع ضوابط لهذا العام لموسم الحج وذلك لتقيلل احتمالات
اصابة حجاج بيت الله الحرام بانفلونزا الخنازير قرار جريء
وربما يكون من اخطر واشجع القرارات التي اتخذها العالم الاسلامي

ونجد تهافت الدول الاسلامية لتنفيذ بنود هذا القرارمنقطع النظير
وذلك مرة اخرى لاهتمام هذه الدول برعاياها.

ولكن

لماذا لم تتخذ اجراءات مماثلة لباقي الانشطه والدول؟

اوضح اكثر

مثلا لماذا لم تمنع السياحة في مصر؟
مثلا لماذا لم يمنع السفر الى لندن؟
ولا رفيجنا بوعبدالله كاهو شزينه قاعد في زلمسي، احد كلمك يبا؟

ليش مافي احتكاك بالناس؟ ولا المصابين بس يروحون الحج؟

انزين في الكرسميس شنو ردة فعلنا لو احتفلوا المسيحين عادي وبدون اي قرارات؟
هاااااااااا المصل المعالج راح يظهر قبل الكريسمس اوكيييه عدل

مره ثانيه اثني على القرار ولكن لا تخلونا نحس انه على ناس وناس

مع تحيات حجي جيفرسون
لعلي رسمت الابتسامة على شفاه احد

كويتي في جزيرة جمس بوند

كنت رايح جزيرة جمس بوند القريبة من جزيرة بوكت في تايلاند
حلو

الرحلة تشمل اكثر من فعالية
اول شي رحنا جزيرة جمس بوند
وشفنا جمال الطبيعه والهدوء العجييييب
وليش مسمينها جزيرة جمس بوند بس لان جمس بوند سوى فيها فلم من افلامه
عقبها رحنا عند الكهوف المائية واللي رحنالها بقارب تجديف
شي لا يوصف جمال يفوق الوصف
عقبها رحنا مدينه مبنية على سطح البحر
جميع سكانها من المسلمين المهاجرين من اندوسيا قبل 200 سنه او اكثر
نزلنا في القرية وشفنا سوقهم ومدرستهم ومطاعمهم
وكان في حمام عمومي
رحت الحمام
فيها شي
بروح الحمام
رحت الحمام بس كان زحمه وقعدت انطر بره على الكرسي
ولا يقعد يمي واحد
صبي صغير
بس اشباهه مو من هذول لا غير
قلت له سلام
قال سلام
قلت انت من وين؟
قال كويتي
قلت اوخ في قرية بتايلاند على سطح البحر وآخر الدنيا وكويتي!!!!!!!!!
والله عجيبه
قلت مع منو ياي؟
قال مع اهلي
قلت ها اشوه بعد عبالي كويتي ياي هني وهاده وماشي، لا اشوه طلع سايح
عاد الحين بدت الهذره
قالي انت شنو اصلك؟
قلت له نعم؟
قال اصلك اصلك؟
قلت له شنو يعني اصلي كويتي بعد شنو
قال لا اصلك: يعني عازمي رشيدي مطيري
قلت له هااااااااااااااااااا لا ياحبوب انا كويتي وبس
قال ايييييييه يعني احضري
قلت له لا يبا اقول لك كويتي شسالفه
شوي ولا ياي ابوه
طبعا كل هذا صار واحنا بالاستراحه يم الحمام
قام وراح مع ابوه وقبل لا يروح قط الكلنكس اللي بايده على الارض
قال له ابوه شيل الكلنكس بسرعه محنا بالكويت حنا
يلا شيله
وشاله وراح

الحين لو هالموقف صاير بالكويت جان قال له شيل الكلنكس؟
جان يمكن قط وياه
يقول له محنا في الكويت
يعني شنو في الكويت عادي وبره لأ!!!!!!!!!!!!!

والله قهر
توني اكتشف ان بعض الناس وصاختهم مو لانهم ما يعرفون النظافه لا لانهم اصلا مايبون يصيرون انظاف
بالكويت طبعا

مع تحيات جيفرسون
لعلي رسم الابتسامة على شفاه احد

رماية الحريم حتى بالسوق

يمكن لاحظتوا اني نقطعت عن مدونتي شوي
والسبب معروف
مساااافر

الوالده الله يحفظها معانا بالسفره وطبعا حمود الجعده
وكل مجمع تدخله لااااااااااااازم حمود يروح صوب ركن الالعاب ويلعب لين يزهق
والوالده تتسوق لين اصحاب المحلات يزهقون

حمود لعبته المفظله رمي المسدسات
والوالده تسوقها المفضل في محلات الجناظ

كل يوم نفس الشي
وطبعا احنا شغلتنا بس كل يوم نسأل الوالده ها يما شنو شريتي
وتراوينا ما لذ وطاب من الحقائب وطبعا لازم تقول اللللللللللللللللللله يهبلون

وحمود هم لازم نقول له ها شنو صار معاك، ويرد ويقول ذبحت البطل ولا قتلت العصابه


الا ان في يوم من الايام حمود راجع بس ويهه مصفوق
منبهر
متعجب
شفيك حمود؟ كنت ضايع؟
لالالالالا رد علينا
جان يقول امي
شفيها امك؟
قمت اخاف منها
حمود شفيك خرعتنا

وقعد حمود يروي لنا فلم الرعب

طلع سلمكم الله ان الوالده واثناء تسوقها في احد المجمعات
لقت لافته تقول : والآن الرماية بالذخيره الحية

يقول حمود خذتني من ايدي ومن صكه لي صكه ومن شارع لي شارع
لييييييييين وصلنا محل كله مسدسات بانواعها واللي يشتغلون من بنات وصبيان لابسين لبس الجيش
وقعدت امي ترطن وياهم ولبسوها سماعه هدفون وعطوها مسدس صجي
وحطولها الهدف و10 طلقات
وحييييييييييل يشتغل الرمي
ومن صجها قاعده تنيشن بعد

آخر شي قيموا اداء الوالده وعطوها 77%

طلعت امي مو هينه تخرع

هذا كلام حمود وتجربته مع تسوق الوالده

سألنا الوالده يما انت من وين تعلمتي الرماية وشنو هالهواية الجديدة
ردها كان: كنت انا وابوكم نرمي البريعصيه بالامصجمه
شوف شلون تدرجت الهواية
شي عجييييييييييب


مع تحيات جيفرسون
لعلي رسمت الابتسامة على شفاه احد

كله عبدالله مطقوق

اول بداياتي مع المدونات كانت عن طريق الصدفة
كانت ازمة التأبين في اوجها وكنت احوس في الجرايد الكويتية والخليجية والعالمية

كنت ادور عن ارشيف الجرايد الكويتية ، كنت ابي صور من الثمانينيات

وصدفة اكتشفت مدونة طاخ طيخ
لقيت فيها تقريبا كل اللي ابي
اخبار من الجرايد / قصاصات / مقالات قديمة

وصرت اتابع المدونة كللللل يوم
الا ان في يوم من الايام وفي عز الازمة شفت المقالة:

حكمت المحكمة

مقالة عجيبة تمزج بين المرح والواقع اللي كان موجود حزتها

واليوم ما ادري ليش طرى على بالي اقرأها مره ثانية،
يمكن الاستجواب اهوا السبب، ما ادري، خو الكويت كلها استجوابات،
البارحة اسمع الوالدة تستجوب الوالد، تقول له انت مو عندك شركة حدادة؟
ما حصلت شي من الخمس ملايين؟
، عادي خلك كوووول

اترككم مع الاستجواب ، قصدي مع كله عبدالله مطقوق
http://www.ma6goog.com/2008/03/blog-post_10.html

مع تحيات جيفرسون
لعلي رسمت الابتسامة على شفاه أحد

ليش الاذون يم الفم

حمود خلص امتحانات عقب ما طلع روح الوالده
واول ما وصل البيت شغل الـ Wii وقام يلعب

وبينما هو يلعب سأل سؤال بصراحة ما ادري يدل على غباء ولا ذكاء

قال يما: تخيلي لو ان الاذون مكانها في الركبه ، جان شلون نتكلم في التلفون النقال؟

تحير الجميع، انبهر الجميع من السؤال؟ تعال جان شلون؟

واحد قال يالله عاد عن العبط
وواحد قال سبحان الله كأنه الله يدري ان في يوم من الايام راح يصير تلفونات ونحتاج الاذون تكون يم الفم
وواحد قال اسم الله عليك مصخن؟

انا بصراحة وقفت متحير



مع تحيات جيفرسون
لعلي رسمت الابتسامة على شفاه أحد

طلع في رقية وحدة بس

الوالده الله يحفظها شوي وتين من اخوي حمود
قاعده تدرسه ومطلع لها مفاعل نووي بمخها

الحين ما ادري اخوي كودنه ولا المدرسة الله بالخير، ما ادري

المهم ، الوالده كانت تدرسة رياضيات وكانت على وشك تطلب تدخل
الامم المتحدة في حل النزاع القائم.

قلت حق الوالده خليني انا ادرسة ربما انجح في ايصال المعلومة بطريقة سلسة

المهم طالعت ولا الدرس عن توحيد المقامات، لالالالا سهالات

مسكت الدفتر وقلت له شوف حمود
ابونا طيب ولا مو طيب؟
قال لااااااااا طيب
حلو
انزين اذا شرالك لعبه شسوي حق عليوي؟
قال هم يشتريله لعبه بعد
تمااااااااااااااااام

الرياضيات نفس الشي
اذا ضربنا المقام في رقم نضرب البسط في نفس الرقم، سهل صح
رد وقال ايييي
حلو الحين اذا ضربنا المقام بـ رقي، شنسوي مع البسط؟
قال نضرب بـ بطيخ

شنووووووووووووووووووووووووووووو
ليييييييييييييييش؟

قال في بس رقية وحده عندنا بالثلاجة، نضرب بالمقام بالبطيخ

قم قم قم روح حق امك لا الحين افقد


مع تحيات جيفرسون
لعلي رسمت الابتسامة على شفاه احد

شو يعني طفوليييه

راقت لي فنقلتها لكم

http://www.youtube.com/watch?v=qyNpYTt5WfU

ما قبل الانتخابات

يوم الانتخابات الصبح كنت بالطيارة راجع الى ارض الوطن الغالي
عشان اصوت واختار من يمثلني دبلوماسيا في مجلس الامه
اقولهم خلوني استمتع بالسفره مالي خلق ارجع
لاااااااااااه، صوتك مهم
الا ترجع تقول كأن جيفرسون الي بينجح ويسقط

وانا قاعد اتحلطم ليش هديت البراد والقعده الحلوه وو واذا بي....

عندنا الله يسلمكم غرفة للخدامة
وطبعا غرفة الخدامه هذي بالملحق
والملحق مثل ما انتو تعرفون يطل على الفريج

دخلت غرفتها ولا ما في احد
هاه ليش؟ وينها من صباح الله خير؟
دخلت الغرفة ، فتحت الليتات، ولا اشوف شي غريب
في فتحة في الطوفة، جهة الفريج
واكو واحد ماد ايده ويطقطق كأنه يعطي اشاره
للخدامه يعني تعالي انا بره

انا شفت الايد وعلى طول فنقر من قلب، حد الدوسه
ولا الاخ ما زال حاط ايده ويكمل وانا حيل تفنقر واشوت فيه
حيل حيل حيل

شوي و ما اسمع الا الي يمي بالطياره يقول اسم الله عليك اسم الله عليك
قلت ها؟ شنو؟ شصار؟

ما اشوف الا الي قاعد بالكرسي الي جدامي ملتفت علي
مقفهر من الفناقر الي ياتله من تحت الكشن
اثاري كل فنقر سويته كان ياي رايت على الحبيب الي جدامي

الي يمي: شفيك يالحبيب ؟ تبي ماي؟
قلت له لا شكرا، بس وين الخدامه؟

انا قلت وين الخدامه
هههههههههههههههههههههههههههههههههههههههههههههههههههه
بعد اعتقد تعرفون اي نوع من الفصلات صار

اثاريني طلعت حلمان ، شكو الخدامه بالسفره بالانتخابات، ما ادري

انا بالمستقبل ماراح اصوت الا حق العضو الي يحلم عني
اي بصراحه انا اقطع سفرتي وجواثيم بالطياره واهوا يحقق كل احلامه، لا ما ابي

تدرون، اشرايكم ارشح نفسي وانتوا تحلمون بدالي؟


مع تحيات جيفرسون
لعلي رسمت الابتسامة على شفاه أحد

شايل سيارة

حمود الجعده هذا ومثل ما ذكرت في مذكرات سابقه
استيعابه على قده، إمينن الوالده
امطلع لها قرووون

حاليا وانا ادون هذه المذكره قاعد يحن حن
الا يبي قاري
على الغدا: ابي قاري
على الشاي: ابي قاري
قبل لا ينام: ابي قاري
عقب ما يقعد: ابي قاري

مو ناقص الا يسويها نشيده ويقولها في طابور الصباح
او يكتب كتاب ويقدمه حق صندوق المعسرين.

نادته الوالده، شوف حمود، حبيبي، بقول لك شغله وابيك تفهمها عدل
وابيك ما تحن ، ولا تعيد اسطوانتك هذي فاهم؟

قالها شنو

قالت له: شوف ابوك مسكين هالشهر ما عنده فلوس
سيارة اخوك كسرت ظهره، فاااااااهم، خلااااااص؟
خلاص يما لا تحن، عفية عليك.

رد عليها وبكل برود:
ليش؟ ابوي شايل سيارة اخوي؟

ههههههههههههههههههههههههههههههههههههههههههههههههههههههههه


هذا يبله اسويله مدونه بروحه


مع تحيات جيفرسون
لعلي رسمت الابتسامة على شفاه أحد

جرب في المرشح، عادي

هالأيام الدوانية دلع وشغل عدل
كلساع يايلك مرشح او مرشحه
وهذا يسأل عن القروض
وهذا يسأل عن البدون
وهذا يسأل عن التوظيف
وهذا يثري الحوار
وهذا ينتقد
وهذا يعترض
وهذا يؤيد
بس كان واحد في الدوانية باله مشغول، فكره بعيد، سرحااااان
وانا قاعد وابحلق فيه، يا ترى شفيه، شنو حركتة القادمة، شفكر فيه

فجأة صاحبنا نادا الصبي مال الدوانية سليم سليم سليم تعال تعال تعال
شوف روح بره سياره مال انا في كرتون بالدبه روح جيب وقفل سياره، زين؟

راح سليم ورجع شايل معاه كرتون وحطه جدام صاحبنا
صاحبنا قام وفتح الكرتون وطلع الي فيه
شنو الي فيه؟ الي فيه سلمكم الله عباره عن مطاره يحطون فيها مبيد الحشرات
ويضغطون السائل ويرشون على الاماكن المتواجده فيها الحشرات.

رواد الدوانية انتبهوا ، بس قالوا عادي ، عنده مشكله في بيته وشاري له حل

بس انا ما عرفت اقعد على راحه، الا ابي اعرف حق شنو شاريه وليش امنزله الدوانية

قمت وناديته: اقول بو فلان ، هذا الي بيدك حق شنو؟

قال سلمك الله هذا ابريج
اهو قال ابريج، انا فصلت والدوانية اكشتوا في المرشح وبحلقوا عينهم عليه ، ابريييييج؟

اي ابريج

شلون يعني ابريج، رديت عليه، هذا مو مال الحشرات؟
قال اي، بس انا بسويه ابريج

قلت له بلا شلون؟

قال سلمكم الله احنا ناوين نسافر اوربا هالصيف
وحمامات الفنادق مافيها هوز، فاستخدم هذا حق اتطهر

قلت له من صجك، هذا اذا ضغطت الماي الي فيه يطلع لك بضغط 897698645 Kpa
يعني يمكن يخترق القولون والامعاء ومخك بعد، شتقول انت؟

قال لا ما يخترق، بس الحيره تملئ وجهه وشكله توهق
قلت له اشرايك نجربه؟
قال في منو؟
قلت له في منو بعد، فيك؟
قال لا يبا، اخاف يطلع كلامك صج
قلت له ها عيل في منو؟
قال اشرايك في المرشح؟

هههههههههههههههههههههههههههههه

انا بصراحه ناطر الصيف على نار
وناطر رجعة صاحبنا من السفر على جمر
بس بشوف شنو نهاية مشروعه

بعد مو تقولون عني ملقوف
بسأل، ما أسأل؟ بسأل

مع تحيات جيفرسون
لعلي رسمت الابتسامة على شفاه أحد

Extra Worm

ساعات الواحد يتخيل شي وهذا امر طبيعي
بس انه يعيش الخيال ويروح بفكره بعيييييييد هنا تصير المشكله

يمكن ماره عليكم سالفة الشايب:

فية شايب حب يجدد حبة لزوجته العجوز
قالها : اش رايك نعيد ايام زمان
بأنزل عند باب الدكان ونتقابل هناك واتغزل فيك
حبت العجوز الفكره
ونزل الشايب وقعد ينتظر ساعة ساعتين ثلاث ساعات ولا جت العجوز
رجع للبيت لقاها قاعدة تبكي سألها اش فيج؟

قالت :ابــوي ماخلاني اطلع.

اخوي عليوي مثل ما قلت لكم في مدونه سابقه مسوي عملية الدوده الزايده
الحبيب عقبها دش معهد يبي يدرس توفل
المدرسة رحبت فيه بس مستغربه ليش ما حظر آخر حصتين
وقالت له: مستر إليوي واي يو ددنت أتند ذي لاست 2 كلاسس؟
الحبيب بدال لا يكحلها عماها

قال لها كنت مريض، بالمستشفى وسويت عمليه extra worm
ردت عليه باستغراب ورفعت حواجب عيونها الاربعة وقالت:
اكسترا وورم؟؟؟؟؟ وت از ذس؟

الحبيب يعني يبي يتكلم انجليزي وراح ترجم الدوده الزايده ترجمه حرفيه
worm=دوده
extra=زائده

طبعا الفصل صار فصله ، ولما قال لنا السالفه كملنا عليه الفصله،
وعقب ما شبعنا ضحك، قال:

انزيييييين ، بالله يلا قول لي شنو اسم الدوده الزايده بالانجليزي؟
انا قلت: ها
الوالده قالت : ها
قلت له خل ادور بالكمبيوتر، قال لالالالالالا شنو تدور،


قلت ماكو الا استعين فيكم، شسمها؟

على العموم، الشايب والعجوز تخيلوا و عاشوا الدور
وعليوي والدوده هم تخيلوا عاشوا الدور لان عليوي
كان متخيل انها دوده من صج كانت تتمشى في جسمه.

مع تحيات جيفرسون
لعلي رسم الابتسامة على شفاه أحد

زلة إلسان في مشهدين

سلمكم الله ساعات الواحد يقط كلمات من غير ما يقصد
اكو ناس تقول ما اكو شي زلة السان
واكو ناس تقول في

بس الي صار ما ادري زلة السان ولا تصريحات العقل الباطن
ما أدري خل نشوف وانتوا حكموا:

المشهد الأول:

في برنامج يذاع على المارينا اف ام اسمه المرش
لما يخسر المشارك يقول له المذيع: يلا قووول الكلمة الشهيرة
يقوم المشارك ويقول: انا جيفرسون وانا خسراااان، تمام؟

تمام، اخوي الصغير امطلع عين امي، مو راضي يفهم، حاولت يمين
يسار ما كو فايده، ولا انا بغرفتي واسمع اصرااااااخ الوالده، تقول جنه
ضابط قاعد يحقق مع ملوت الفرعيات.

رحت أهدي الوالده، بعد مالنا غيرها، اخاف تين ولا تشيب يقوم الوالد
وياخذ عليها وحده ثانية ، كلش مو وقته.

رحت وسويت روحي ما ادري وقعدت يمهم بالصاله، ولا الوالده تقول
حق الجعده، النبي (ص) لما انتصرعليهم قال لهم شنو تظنون اني بسوي
فيكم؟ قالوا له اخ كريم وابن اخ كريم صح؟ رد عليها اخوي صح يما،

وبعدين قالت له لي الحين تمام، انزيييييييييين النبي رد عليهم وقال لهم
كلمه، كلمة شهيرة، شنو الكلمه الشهيررررررررررررررة؟

رد اخوي واهوا امبحلق عينه، قال: انا حمود وانا خسرررررررران.
هههههههههههههههههههههههههههههههههههههههههههههههههههههه

انا فصلت من الضحك، والوالده قام تمشع شعرها، واخوي يقول شنو اشقلت؟

اااااااااااااااااه ذبحني هلولد

المشهد الثاني:

رحت البحرين السبت الي فات، وقلت خل امر رفيجي وصديق الدراسه
قلت خل افاجئة واخليه يستانس

حطيت النافيقيتر على بيتهم و وشه، ما شاء الله وصلني لي عند عتبة الباب
طقيت الباب وطلع لي:

هلاااااااااااااااااااااااااااا جيفرسون
شلوووووووووووووووونك؟ طيب؟
يا حي الله من جاناااااااا

وفجأة وبدال لايقول زارتنا البركة، قال:
زارتنا البقرة
ههههههههههههههههههههههههههههههههههههههههههههههههههه
ونفصل لك فصله غير نمونه،


يلا عندكم مشهدين ياترا الي صار زلة إلسان ولا بواطن العقل الباطن؟

بس الي يضحك على سالفة البقرة يا ويله، احنا ياين نتعلم، اي والله.

مع تحيات جيفرسون
لعلي رسمت الابتسامة على شفاه أحد

طلع فيه دوده

ذاك اليوم عليوي اخوي حن علينا حنه
بطني يعورني ودوني الطبيييييييييييييب
محد له خلق يوديه

الي يقول له تلحف وادفى ونام
ولي يقول له اخذ بندول
ولي يقول له اعصر لك ليمونه

لا الولد مو قادر ، العوار قاعد يزيد
قلت له قوم اوديك الطبيب، طبعا هذا الكلام عقب 6 ساعات من المعانات

أي طبيب اوديه ؟ ويييييييين؟ مالي خلق مستشفى مبارك
قلت اوديه خصوصي

وديته وراح دخل على طبيب الطوارئ
وبعد شوي طلع الدكتور يقول احتمال فيه دوده زايده
وليييييييييييييييييييييييييييه
هذا وقت دووود

قلت تدري شلون خل اروح الرسبشن وأسأل
كم تكلف عملية الدوده الزايده
رحت أسأل ولا في وحده واقف قبلي وجرى بينها وبين الرسبشن
الحوار التالي:

الاخت: ممكن اعرف اخوي كم تكلف عملية الطهور؟
الرسبشن: اختي يعتمد، كم عمره الطفل؟
الاخت: 8 شهور؟
الرسبشن: تكلفة عملية الطهور من 450 الى 500 دينار كويتي

جان أنط وأقول، اووووووووووووله 500 دينار تطهير ياهل، عساه ما تطهر ان شاء الله
500 دينار فيها لاب توب و نقال وسماعه بلوتوث و عشا مع الربع في شارع المطاعم.

الاخت عطتني نظره وكأن لسان حالها يقول وانت شكو يا الملقوف

قلت يا معود خل امشي وماني سائل عن تكلفة عملية الدوده الزايده لا يوقف قلبي بعد
وقررت اروح حق الدكتور واقول له يا معود تأكد يمكن مو دوده، يمكن أدغاث أحلام؟

بس الحمد لله بعد قرار تخفيف الفائده على القروض ما في اي مشكله. البيب بالاشارة يفهم.

مع تحيات جيفرسون
لعلي رسمت الابتسامة على شفاه أحد

واحد شااااااااااااااااااااااااي

اليوم كنت رايح مدرسة من المدارس وقاعد في غرفة الناظره
وكان في واحد من اولياء الامور قاعد يمي وناطر
الكل ناطر الناظرة.

المهم ما قصروا يابولنا ابيالة شاي وحطوها على الطاوله
وحده لي ووحده له
ومع كل استكانة جاي حاطي كيس شكر
الاخ العزيز فتح كيس الشكر وبدال لا يفرغ الشكر في البياله فرغ الشكر على الطاوله
قلت له يا الحبيب اشفيك؟
التفت علي ولا المسكين الأخ حول
قلت له لا م في شي حصل خير
شرب الشاي وان اضحك
ولا قال اشفي الشاي مر ابدا ولا كلمه

يت الفراشه تشيل الاستكانات وجان تطالعني بنظره
كأنها تقول ليش جذيه عاد؟؟؟ ليش كاب الشكر؟

والله ابتلشت بلشه انا

مع تحيات جيفرسون

لعلي رسمت الابتسامة على شفاه أحد

الخطر معاهم

والله حاله والله بغبسه

قاعد اطالع قناة فلاش
قلت يمكن اشوف هذا الي يسمونه بوخرشد
امس بالدوانية ما عندهم حجي الا عن اخباله

حطيته على فلاش
ولا حاطين تمثيلية كويتية اكشن اسمها الخطر معاهم
اوووووووووووووووو ولا حركات عجيبه
وامطامر
ومددسات على قولة واحد من اليهال

ولا شوي ولا لاحقين المجرم بره بالشارع
وتصير المطاردة على خط فحيحيل السريع
جمال الردهان مع طارق العلي لاحقين المجرمين
على جسر مشاة حولي صوب نادي القادسية

المجرمين من فووق الجسر نطو على شاحنه شايله اسفنج وبنزين
شوف الصدفه ها

وبسرعة تفوق سرعة الصوت
غافل المجرم سائق الشحنه وقطه من كابينة القيادة وتولى القيادة بنفسة
والمجرم الثاني تم منسدح على الاسفنج

وبعدين فكر ثم فكر وقال خل اقط درامات البنزين في الشارع وارميهم
وراح ينفجرون في المباحث
وفعلا سوى مخططه الاجرامي

الحين السؤال انا بفهم شغله وحده
احنا خو مو قاعدين في استديوهات هوليود عشان نسوي هلقطات
لا في شوارع دولة الكويت
الشي الي متأكد منه ان البنزين لما يحترق على القار يزيل الطبقة العلوية منه
يعني الشارع الي سوو فيه هلقطات الحين فيه حفر لي قبل

هذا طبعا غير صبات الاسمنت الي اندعمت بالشفر الابيض بو حديده

من يتحمل تكاليف تصليح كل هلدمار؟

بس الحمد لله جسر مشاة حولي ما طاح من ركظة جمال الردهان عليه اووووف جان ابتلشنا

مع تحيات جيفرسون
لعلي رسمت الابتسامة على شفاه أحد

وين يروح الكلنكس؟

يعني بصراحة الواحد بهلديره كل يوم يشوف العجايب

قبل، ايام اول
الكويتين مساكين غير الطباخ الكويتي ما يعرفون
شوي ولا داش عليهم الطباخ الايراني والعراقي
بحكم الجيره، طبعا بالإضافة للطباخ السعودي.

بعد فتره لا صارت الأذواق متنوعه، ايطالي ياباني امريكي
وعد وخربط لي الصبح.

بس انا شفت واحد عجيب
اكله عجيب
ذوقه عجيب
وطبعا كويتي مو تقول صيني ولا تايلاندي لا كويتي

اخونا هذا الله يهداه يحب ياكل شنو؟

يحب ويموت على أكل الكلنكس
ليش ما ادري
شلون ماأدري
تلقاه قاعد وصااااافن وقاعد يعلج
وانت ما تدري ولا اثاريه طايحله بهلكنكس مال الديوانية


مع تحيات جيفرسون
لعلي رسمت الابتسامة على شفاه أحد

اشتغل المكيف

يوم من الأيام الوالد الله يحفظه اشترى لنا حوض سباحه
وقال هذا حق اليهال، والله ان شفت واحد من الكبار يسبح فيه
ما يلوم الا نفسه.

الحوض سلمكم الله من النايلون وفيه مضخه وسلم على شكل الرقم 8 بالعربي.
موجود منه في محلات الالعاب.

عقب كم يوم اخترب الفلتر، وعقب كم يوم انقظ الحوض، قلنا افتكينه
خلااااااااااااااااص من لوية اليهال وحنتهم.

فقرر الوالد يشيل الحوض، وقرر ان يشيله ويخزنه فوق السطح، ليش؟
لي الحين محد عارف السر.

بعد كم شهر ، قامت الخدامة وبالخطأ وقطت الحدايد ملوت الحوض، ويسويلها
الوالد ، محاكمة تقريبا نفس محاكمة صدام.

بعد كم شهر، قرر الوالد وطبعا بتأثير من الوالده انه يرمي الحوض، خلاص يأس
منه، ناقص حدايد ومقظوظ بعد ما له جاره غير القط.

وبقى فوق السطح بس السلم الي على شكل رقم 8، وهني محور الحديث.

اليوم كان حر، وقال لي الوالد يلا رح فوق وشغل المكيف شكله الصيف ياكم.
اخذت اخوي ورحنا فوق السطح.

مكينة التكييف يبلها سلم عشان نروحلها، ومالقينا غير سلم الحوض، تمام؟

صعد اخوي فوق، وهو ماشاء الله ضعيف، وقام يسألني : اي دقمه ادوس؟ قلت له اشدراني؟
قال انزين اصعد وياي، قلت له ها، اخاف ادبغ؟ قال اصعد زين خلصنا.

صعدت وياه وشغلنا المكيف، واسمع الوالد من الدري يصرخ اشتغل اشتغل خلاص.
مستاااااااااااااااااانس الوالد اشتغل المكيف.

وقال لي اخوي يلا انزل، قلت له لا انت اول، قال لا انت الكبير.

والله وكيلكم انا حطيت ريولي على السلم البلاستك مال الحوض وما اشوف نفسي
الا واقف على السطح وتحتي كسار العتبات ، شنو هلسرعه ما ادري. اثاري السلم
منهري من الشمس وناطر احد يقضي عليه.

اريولي تزلقت، الدمان من كل صوب، الحدايد ملوت السلم ادخلوا في اباطي تقول عكازات.
ولي بط جبدي اكثر، ان الخايس اخوي بال بصرواله من الضحك علي. يقول لو شايف شكلك
وانت نازل تقول صاروووووخ. شكلك عجيب.

وتشتغل فيني اللعانه وانزل تحت بحط حرتي بالوالد، واخوي يناديني تعال تعال يبلي سلم
ثاني ، وكشت فيه ونزلت تحت، واصرخ وين الوالد؟ ردوا علي الوالد من اشتغل المكيف
اخذ الوالده ودشوا الدار. ها؟ الدار؟ ما ادري اعفسها عليهم؟ قلت خلاص المسامح كريم،

بس ترى لي الحين اخوي فوق السطح حتى كتابة هذه المذكرة.

مع تحيات جيفرسون
مع ان اباطي ذابحني بس هم لعلي رسم الابتسامة على شفاه احد

رشرشها يا وليدان

سلام

اتذكر ايام قبل اول ما الناس قام تقص شعر اعيالها قصة المارينز
اووووووووووووووو هذا الي يستنكر وهذا الي يطنز وهذا يقول
تتشبهون بالمشركين ووووو

وبعد كم سنه صارت قصة المارينز قصة عادية كلللللش ، ولا تلقى
من المتدينين يقصون شعر عيالهم هلقصة. ليش؟

من كم شهر كنت استمع لاذاعة مارينا اف ام ومايك امبلتع وبرنامج
لطيف اسمة عطني الكلمة جمع مفرد، وكان يقدم بطريقة شبابية
وفي اللعبة قوانين ظريفة ومضحكه.

رشرشها يا وليدان

كنت مع الاهل وكانوا بقولون قطع اشملقه، سخيف، هلاقه، يبط الجبد
وانا مع اني ما استمع لباقي البرامج، كنت اقول لا بصراحه يناسب الشباب و عطوه كم شهر راح يكتسح
الساحه بس نطرو.

وفعلا اليوم وبعد اشهر كان الحديث عن رشرشها ياوليدان وشنو قال واشلون
كان يضحك، اخوي يقول حق رفيجه الللللللللللللللللله، واختي تقول لي قول الكلمة الشهيرة.

شاهد او استمع للبث المباشر من موقع المارينا اف ام : http://www.marinafm.net/


ليش كل شي جديد منبوذ وبعدين يصير عادي؟

مع تحيات جيفرسون
لعلي رسمت الابتسامة على شفاه أحد

صمون حلاااااااااااااااااال

بو عبدالله واحد من المتابعين لمدونتي وارسل لي هذه المشاركة واسردها لكم كما هي:

( صمون حلال )

يقول مرة في أمريكا ... كنت ميت جوع ... والطيارة تبي تطير داخلي

يقول رحت ماكدونلدز ... وغصب فهمتها ابي " بيض "ولا تحطين معاه شي ثاني

يقول شريت يمكن 7 صموناتوركككككضه من جيت لي جيت حق الطيارة

المهم ... ركبنا وطارت الطيارة بحفظ الله ... بعد شوي ولا يجيوبن ... ريوقهم ...

يقول آنه .. آنه اطلع المضيفة .. وابتسم ... وآنه حاظن كيس الصمون ..شني حاظن ولدي الوحيد ... وطافتنا الحجية ومعاها الريوق ... ونطلع البيبسي ... واوزع على العيال و امهم ... المشروبات البارده ... و أفتح كيس الصمون .. وإلا .... ـلحم !!!!!!!ـشنو هذا ؟؟؟؟؟؟؟لحم .... معاه بيض:(((بنت الـ ... " طوووط " مالت المطعم الحين آنه شنو اسوي ؟شنو آكل .. وآنه يوعاااان ؟مت قهر!!!!قمت اوزع الصمون على الأجانب الي يمي .. واهما مو مصدقين وتاليتها ...سبال ... لين وصلنا:))))

مع تحيات بو عبدالله

أباليس الانس من الكويت

أباليس الانس من الكويت

اول شي سوري على الانقطاع

وشكرا لكل من سأل

بس والله مشتاق لكم.....


يسولف لي واحد من الشباب انه كان يدرس في امريكا
وكان معاه شله من كويتيين و خليجين
وكانت الاوضاع الدراسية عال العال
كان الطالب يحصل على 60% يعطيه الدكتور A
ليشل لانه ما كان في احد يحصل 100% فيسوي الدكتور كيرف
ويعدل الدرجات

الى ان في يوم من الايام انظم للدراسة معاهم طالب الماني
يقولك هذا الطالب موسوعة متنقله، كمبيوتر ، مخه عن امخووخ طلبة الجامعه كلهم.

اول ماده درس وياهم جان يجيب 100%
يعني الدكتور ما يقدر يسوي كيرف......... وراحو فيها طلبتنا

فاجتمعوا الطلبة الخليجين بقيادة الطلبة الكويتين لدراسة المشكلة
ووضع الحلول المناسبة بس كانت حلولهم مو عشان يصيرون مثله
لالالالالالا بس عشان يصير اهوا مثلهم
وجيفرسون قاعد يتسمع وامبحلق عينه وسااااكت

اول واحد اقترح وقال اشرايكم نسويله سحر
ثاني واحد قال: لا يبا سحر ، وكان في واحد من الطلبه سيد فقال له اشرايك سيدنا تقرا عليه
ثالث واحد قال: لا يبا لا سحر ولا طلاسم، انا اخليه يصير صايع بس ابي كم فلس
قالوا افلووووووس افا عليك مو مشكله، بس الخطه مضمونه؟
رد عليهم افا عليكم خلوا السالفه علي

بعد فتره ولا الجماعه مجتمعين للاحتفال بالنصر العظيم
ولا الاخ الالماني قاعد يحتفل وياهم

اثاري اعيال اللذينه، خربوا الولد ، صار راعي بنات وديسكوات
وبارات وووووو وصارت درجاته اقل من درجاتهم و راح فيها.


بس سمعت القصة، حسيت ان ابليس ما كان موجود معاهم
لانهم كانوا هم اباليس

بس أغرب شي ان واحد من الطلبه الحين صار دكتور في الجامعه

مع تحيات جيفرسون
لعلي رسمت الابتسامة على شفاه احد

جماد حيوان نبات

اخوي الصغير عازم رفيجه حمود وقاعدين يلعبون
مره بالحوش ومره بالحديقه، رفيج اخوي تغدى معانا
على نفس الطاوله، بس الله يهداه، خر الاكو والماكو،

مثلا ولا على سبيل المثال لا الحصر، ابوي شرى حق امي هدية،
خالتي متهاوشه ويا ابوي، خدامتنا لقيناها مع واحد بغرفتها،
وسوالف وسوالف، اسكته يبا خلاص ما يقولون حبيبي هلسوالف
بس مسكين فيه هذره غير نمونه.

المغرب قعدت وياهم بالصاله، ولا الحبيب قاعد يشرح قصة
اخته الكبيره وزواجها،
هووووووووووووووووب حمود، شوف اشرايك تلعب معاي؟
نلعب شنو؟ قلت ها ، ما ادري، اي لعبه، قال يلا جماد حيوان.

جماد حيوان يلا، بس خل نضيع السالفه المهم تجمعنا كلنا،
انا واخوي واختي وحمود نلعب جماد حيوان.
انا عبالي اللعبه سخيفه ويمكن اهيا فعلا لعبه سخيفه، بس اللعب
مع اليهال فيه فصله عجيييييبه.

على اليهال تحريفات عجيبه، مثلا حيوان حرف ح = حمارعرفناها،
بس حيوان حرف أ = احمار شلون ما ادري، بلاد حرف أ = اكويت احلى،
اولاد حرف ت = تامر يبا مافي تامر في ثامر، قال لا في تامر، تامر تامر، تامر امر انت،
عاد تعال شوف الجماد:
غنفه
درنفيس
مقله
بلي ستيشن
ريموت
كلنكس

واللعبه مستمره وانا فاصل عليهم من الضحك، طبعا غالبيني مليون صفر،
ولكن نهاية اللعبه كانت على ايد حمود لما قال جماد حرف ك = كوتكس

هههههههههههههههههههههههههههههههههههههههههههههههههههههههه
والله عمي كوتكس
بس حمووود
صدقني ابوي يشتري من الجمعيه كوتكس
حمووووووووووووووووود خلاص مصدقك بس

شسوي في هلولد، ذبحنا، فطسنا من الضحك، يصير اوديه محل كمبيوتر
اسويله فورمات؟ ولا اوديه حق رفيجي بوعبدالله بوزارة الاشغال يفرمته ببلاش؟

مع تحيات جيفرسون
لعلي رسمت الابتسامة على شفاه أحد

تخرب الي ما يخترب

لما اتحدث مع اشخاص غير عرب اغلب الاحيان اكلمهم باللغة الانجليزية
احس اني وايد اقدر اوصل المعلومة لهم بسرعة ويسر، بصراحة بدلياتي بالانجليزي
وايد وايد اقل من العربي، يمكن هذا تأثير الفترة التي عشتها في برايتون البريطانية
ولا بصراحة بعد، افهم وايد اشياء عن بريطانيا مثل حزب العمال البريطاني واهدافه ولي
الحين مو فاهم حزب الامة الكويتي وأهدافه.

في هذا الاسبوع صار معاي 3 مواقف، الاول لما كنت اراجع الدكتور، رحب فيني
ورحبت فيه وكنت اكلمه بالانجليزي وهو يكلمني بالكويتي مع انه هندي، عطيته
فرصه، عطيته نغزه، مو راضي يفهم، وآخرتها قال لي: "انت مهتاج مزااااز هيوي"
قلت له "What" قال " مزااااز هيوي" قلت له بالكويتي شنو هذا "موزااااز هيوي"
قال "مزاااز مزااااز" كل اسنأش ساأه، قلت له هااااااااااااااااااااااااااا مضاد حيوي!!!
اي قولها بالانجليزي غربلك الله.

الموقف الثاني لما انعزمت ورحت مطعم، وصل دوري عشان اطلب وما كان لي خلق اقرا المنيو،
قلت له بالانجليزي في عندكم ربيان، رد الجرسون الهندي علي بالكويتي "في ربيان مشوي، مكلي،
بالبكسمااااااات، وفي ربيان تش تش" ها شنو؟ شنو هذا تش تش، جان يرد هذا ربيان مثل
بخور يسوي تش تش، عجيب هذا المطعم شنو تش تش وشنو بخور، انا عناد ولقافه، قلت له
يلا يبلي تش تش. وطلع بالنهاية ماعون حديد مركب على قاعده خشب والربيان مكود مناك
وفيه 785874 سعره حرارية، ولدخنه طالعه منه تقول حرايج النفط ايام الغزو، شنو هذا ؟
قال هازا تش تش، الربع ضحك، انا فصلت قمنا نهف على الماعون جنه شابين حريجه براس
العاير ومتوهقين فيها.

اما الموقف الثالث والاخير، رحت كوفي شوب في مجمع الراية الراقي،
بعد اهني لازم يعرفون انجليزي ، صح؟ كعادة جيفرسون ولقافته، طلبت طلبات جديده
مو مجربها من قبل، يابو الطلب ولا كل شي على قولتهم يهبل، وبعدين قررت اطلب
عصير فراوله بالليمون، استغرب الجرسون،ورد علي باكويتي شلون؟ ما يصير،
هازا هامز وهازا هلو؟ قلت له انا ابي جذيه، الجرسون كان فلبيني،
بس رده علي كان بالسوري وقال:

تكرم عينك، على راسي. حلالالالالالاته.

ما تقولون شنو الحل ليش ما يردون علي بالانجليزي؟
ولا ديرتنا تخرب الي ما يخترب؟

مع تحيات جيفرسون
لعلي رسمت الابتسامة على شفاه أحد

ان لم يكن لكم دين فكونوا احرارا في دنياكم

عندما اطلق المغبور صدام حسين ، عليه لعنة الله والملائكة والناس أجمعين،
حربه الضروس على ايران واباد مئات الالاف من الابرياء، وقف معه اغلب
العرب بحجة العروبة ثم تخيلوا انه حامي البوابة الشرقية، وآخرون كانوا يقولون
انصر اخاك ظالما او مظلوما ،،، فوقفوا معه وقفة رجل واحد وامدوه بالمال
والسلاح ووصل الحال لبعض الدول انها ارسلت له الجنود لنيل شرف المشاركة
في القتال....

وبعد 8 سنوات توقفت الحرب وراحت الانفس و الاموال واعاد صدام جنود

الدول العربية بتوابيتهم، ثم غزى الكويت، كأول بادرة منه لرد الجميل لكل من وقف معه.

وقعدنا نلطم بالكويت ، افا يا الجار ، هذا جزانا؟ الللللللللللى ان من الله علينا بنعمة

التحرير وهي نعمة عظيمة بكل المقاييس.

واليوم من يستغيث في غزه هم عرب، اطفال، نساء وشيوخ،،، يستشهدون، يصرخون
ولم اجد من تفاعل معهم بغير جمع الاموال والبطانيات والادوية، وهناك من خرج في مسيرات
يعبر فيها عن امتعاضه الشديد والغير شديد.

انا بودي افهم شي واحد بس، ليش اختلفت المعايير بين ايران وفلسطين؟ هل تغيرت الشعوب؟
هل تغيرت القناعات؟ هل تغيرت الدماء؟ ام هناك من يوجهنا بالريموت كنترول ويطلب
منا عن بعد كيف نتعامل مع الاحداث؟

عندما واجهه الامام الحسين ع جيش يزيد وجهه لهم الخطاب قائلا:

ان لم يكن لكم دين، وكنتم لا تخافون المعاد، فكونوا احرار في دنياكم، ان كنتم عربا كما تدعون....

اعجبني طرد فنزويلا للسفير الاسرائيلي كردة فعل للجرائم الاسرائيلية على العرب في غزه،

اعتقد ان قادة فنزويلا احرار في دنياهم.

مع تحيات جيفرسون

اني وجهة للخلق النداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
يا طريح الطف يا نبع الفــــــــداء إنني قــدمـــت للخلــق النــــــــــداء
سوف نحيى دون ذل في العبــــاد إن مشينا دربــــك درب الســـــــداد
دمه للدين أضحـــى كالعمــــــــاد وهــو نور قـد مشــى في كــــل واد

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
عندما جاء اللعيـن بالغـــــــــــزاة في ظلام الليـــل والنــاس سبـــــات
كنت نوراً تمحي فينا الظلمـــــات اقتدينــــا فيــك يا خيــر الحمـــــــاة
فثبتنـا رغم أنات العـنــــــــــــــاء إننـــي وجهــت للخلق النــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
سيدي أنت المبيــد للظـــــــــــلال إذ وقفــت للعدا مثــــل الجبــــــــال
تطلب الحق وقـــد قـل الرجـــــال عندمــــا قلت تعــالــوا للقتـــــــــال
إننــا جندك يا خير رجـــــــــــــاء إننـي وجهـــت للخلق النـــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
أيها المدفون في أرض العــــراق كـم تلاقي من عـــــذاب لا يطـــاق
من يزيد العصــر رواج النفــــاق إذ يصيب القبــــر هدماً واحـــتراق
سيدي زاد اشتيـاقـــي للقــــــــــاء إنني وجهـــت للخلق النــــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
صيحـة صحت بها للعالمــــــــين كونوا أحراراً تعيشــــوا غانمـــــين
مهما زاد الضيم فيكم والأنـيـــــن كونوا دوماً كالجبـــــال شامخـــــين
إننا من نهجـــك نلنا الإبـــــــــــاء إنني وجهـــت للخلق النــــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
سيدي لولا الدمــــاء ما استقـــــام دين أحمد في الورى رغم اللئــــــام
سيدي علمتـنــا أن لا نضـــــــــام أنت نور قد هدانــــا في الظـــــــلام
سوف نستقي منــــك العطــــــــاء إنني وجهـــت للخلق النــــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
سيـدي هذي عـداكـم في القصـور تقتل الشيعـــة ظلمـاً وتجـــــــــــور
كفـرونـا قالوا عبـاد القبــــــــــور حاربونا باتهامـــــــــــــــات وزور
مهما زادوا سيدي يبقــى الـــولاء إنني وجهـت للخلق النــــــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
أيها السبــط الذي صاغ الحيـــــاة بدماه إذ فـــدى الديـن بالحيــــــــــاة
وأرانا النحر دربــاً للنجــــــــــــاة لا يهاب الموت كي يردي الجنــــاة
أنت شمس يهتدي فيهــا الضيـــاء إنني وجهـت للخلق النــــــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
هذه الذكــرى تعــود من جــديـــد نذكــر السبــط بعـاشورا نعـيــــــــد
هاهي الذكرى في أعماق الوريــد تجري فينــا تحمل الدرب السديــــد
نحن نهوى ابن خيــر الأنبيــــــاء إنني وجهـت للخلق النــــــــــــــداء

يــا ســائــــلاً عن الحســـــــــــين
هو الـــفــــداء هو الإبــــــــــــــــاء
سيــدي غالوك يا سبـط الرســول كي ينالوا منك حقــــداً كــي تــزول
أنت نجم لا ترى يوماً أفـــــــــول تبقى فينا سيدي تهــدي العـقــــــول
سيدي لولاك ما قـــام البنـــــــــاء إنني وجهــت للخلق النـــــــــــــداء

يــا ســائــــلاً عن الحســـــــــــين هو الـــفــــداء هو الإبــــــــــــــــاء

~

في مثل هذه الايام من محرم امتلأت الارض بالسواد على قتل ابن بنت نبي الله، الحسين بن علي (ع)
واكثر من حزن في مثل هذا اليوم هم اهل الكوفه لانهم هم انفسهم من دعوا الحسين (ع)
وطلبوا منه تسلم زمام الامور بعد ان تسلط عليهم يزيد بن معاوية.

وبعدما لبى الحسين (ع) النداء واعلن ثورته الخالدة، تخاذل اهل الكوفة عن نصرته ،
وبذلك البسوا انفسهم لباس الذل و المهانة واصبحوا على ما فعلو نادمين.

الآن، نعم الآن

وغزة تنادي، تستصرخ، هل من ناصر؟ هل من مغيث؟ هل من غيور؟

لو تخيلنا ان الحسين (ع) ظهر في زماننا هذا واعلن عن ثورته مرة اخرى
لنصرة المستضعفين في غزة، هل يا ترى سننصره ونقف بجانبه ونضحي
من اجل ثورته الباسله بالمال والبنين والانفس؟ ام نقول له

اذهب انت وربك وقاتلا انا ها هنا قاعدون؟ فنصبح بذلك اهل الكوفة؟

عذرا لك يا بن رسول الله ، ها هو الزمان يعود من جديد ويخذلك اهل الكوفة الجدد،
حيث لا يوجد الا القليل من المؤمنين الذين سينصرونك وسيقفون معك، اما الباقون
فهم يخافون على اولادهم واموالهم ونسائهم وانفسهم واغلبهم بانتظار مؤشر سوق الاسهم الاخضر.

فيا ليتنا كنا معك ..... ها ..... لست ادري سنكون معك ام لا.....

مع تحيات جيفرسون
لا استطيع رسم ابتسامه على شفاه احد واهل غزه يموتون

عظم الله اجوركم

هل تتسبح ولا لا؟

كنت رايح ديوانية
كان المجلس عامر
وكنت اسمع نقاش من هنا وهناك
عن ما دمرته آلة الحرب الصهيونية
والشهداء والاطفال في غزه.

وبعدين دخل احد الاشخاص وسلم على الحضور
وجلس بجانبي، قدم له شي من الحلوى والقهوى

ثم فجأة وبدون مقدمات قال لي:
الحين مو من المفروض لما الواحد يروح الدوام لازم يتسبح وخصوصا ان في الدوام حريم؟

انا التفت عليه مستغرب ، من سؤاله ، هذا صاحي ولا شفيه؟
قلت له، طبعا لازم الواحد يلبس عدل ويرتب هندامه سواء كان في حريم ولا ما في.

قال انا اعرف واحد مصري كل يوم يتسبح.
قلت له اي عادي لازم الواحد يتسبح.

قال انا اعرف واحد يشتغل بشركه وهو لبناني وشعره اسود وشواربه شقر وهم كل يوم يتسبح.
قلت له يمكن صابغ شواربه ؟ قال لا متأكد لونهم الاصلي اشقر.

الحين رواد الديوانية الباقين مازال حديثم عن غزة وانا خلف الله علي وعلى حالي.

قال انا اعرف كويتي راح مصر مع عايلته، وراحوا حمامات عمومية قديمة وتسبحوا.
قلت له: ليش ما كوا بالكويت حمامات؟ قال لا اهناك فركوهم وطلع منهم سنون.

وبعدين وبدون مقدمات...

قال: تعرف وحيد القرن؟
قلت له: اي اعرفه، اشفيه بعد هم يبي يتسبح، قال: لا عنده قرنين ترى و لو ينطحك يشقحك 5 امتار.

اهني قلت لا الريال الظاهر في مخه وشه.

شوي ولا يقول: تعرف اشلون يذبحون البعير؟
لا حول لله: لا ما اعرف بس البدو يعرفون، قال ترى لي هاج عليك وعضك يلعن بو خامسك.
وليييييييييييييييه

عليه تنقلات بالافكار عجيييييييييييييبه.

قال تعرف منو راعي الحرشا؟
قلت له شنو هذا بعد؟
قال: هذا الشيخ (الفلان الفلاني) كان عنده جمل وكان يحبها وكان اسمها الحرشا.
والله بلاوي.
بعد غرد اشعندك بعد طلع الي في جبدك كله.
خو انا كل هذا حظي.
وين ما اروح يقعدون يمي من هلنماين.

بس آخر شي قال شغله خلتني اقوم وانحاش ويمكن بعد ما اروح هلدوانية ابدا.

قال: تدري ان الشيخ الفلاني ناطحله ذيب؟

قلت له: الله بالخير، انا بروح وراي قعده ودوام.
قال وين تشتغل يا الحبيب؟ قلت له بعييييييييييييد يم الوفره.
قال صج!!!! عيل متى تتسبح بالليل ولا الصبح؟
قلت له الصبح، لييييييييييييييييش؟
قال الصبح تتسبح اول ولا تصلي اول؟
قلت له: اتسبح قبل النوم وبعد النوم وقبل الصلاة وبعد الدوام وقبل لا اروح الدوانية ، زين؟
قال: زين ولا فيفا

ههههههههههههههههههههههههههههههههههههههههههههه

قمت وطلعت، مسكني راعي الدوانيه، قال وين جيفرسون تو الناس؟
قلت له يا معود لا يصير فيني شي من صاحبكم، خل امشي.

قال: هذا مسكين، خسر كل افلوسه وحلاله بالبورصة.

يا ترى هل في مثله امثال؟

مع تحيات جيفرسون
لعي رسمت الابتسامة على شفاه أحد