هل تتسبح ولا لا؟

كنت رايح ديوانية
كان المجلس عامر
وكنت اسمع نقاش من هنا وهناك
عن ما دمرته آلة الحرب الصهيونية
والشهداء والاطفال في غزه.

وبعدين دخل احد الاشخاص وسلم على الحضور
وجلس بجانبي، قدم له شي من الحلوى والقهوى

ثم فجأة وبدون مقدمات قال لي:
الحين مو من المفروض لما الواحد يروح الدوام لازم يتسبح وخصوصا ان في الدوام حريم؟

انا التفت عليه مستغرب ، من سؤاله ، هذا صاحي ولا شفيه؟
قلت له، طبعا لازم الواحد يلبس عدل ويرتب هندامه سواء كان في حريم ولا ما في.

قال انا اعرف واحد مصري كل يوم يتسبح.
قلت له اي عادي لازم الواحد يتسبح.

قال انا اعرف واحد يشتغل بشركه وهو لبناني وشعره اسود وشواربه شقر وهم كل يوم يتسبح.
قلت له يمكن صابغ شواربه ؟ قال لا متأكد لونهم الاصلي اشقر.

الحين رواد الديوانية الباقين مازال حديثم عن غزة وانا خلف الله علي وعلى حالي.

قال انا اعرف كويتي راح مصر مع عايلته، وراحوا حمامات عمومية قديمة وتسبحوا.
قلت له: ليش ما كوا بالكويت حمامات؟ قال لا اهناك فركوهم وطلع منهم سنون.

وبعدين وبدون مقدمات...

قال: تعرف وحيد القرن؟
قلت له: اي اعرفه، اشفيه بعد هم يبي يتسبح، قال: لا عنده قرنين ترى و لو ينطحك يشقحك 5 امتار.

اهني قلت لا الريال الظاهر في مخه وشه.

شوي ولا يقول: تعرف اشلون يذبحون البعير؟
لا حول لله: لا ما اعرف بس البدو يعرفون، قال ترى لي هاج عليك وعضك يلعن بو خامسك.
وليييييييييييييييه

عليه تنقلات بالافكار عجيييييييييييييبه.

قال تعرف منو راعي الحرشا؟
قلت له شنو هذا بعد؟
قال: هذا الشيخ (الفلان الفلاني) كان عنده جمل وكان يحبها وكان اسمها الحرشا.
والله بلاوي.
بعد غرد اشعندك بعد طلع الي في جبدك كله.
خو انا كل هذا حظي.
وين ما اروح يقعدون يمي من هلنماين.

بس آخر شي قال شغله خلتني اقوم وانحاش ويمكن بعد ما اروح هلدوانية ابدا.

قال: تدري ان الشيخ الفلاني ناطحله ذيب؟

قلت له: الله بالخير، انا بروح وراي قعده ودوام.
قال وين تشتغل يا الحبيب؟ قلت له بعييييييييييييد يم الوفره.
قال صج!!!! عيل متى تتسبح بالليل ولا الصبح؟
قلت له الصبح، لييييييييييييييييش؟
قال الصبح تتسبح اول ولا تصلي اول؟
قلت له: اتسبح قبل النوم وبعد النوم وقبل الصلاة وبعد الدوام وقبل لا اروح الدوانية ، زين؟
قال: زين ولا فيفا

ههههههههههههههههههههههههههههههههههههههههههههه

قمت وطلعت، مسكني راعي الدوانيه، قال وين جيفرسون تو الناس؟
قلت له يا معود لا يصير فيني شي من صاحبكم، خل امشي.

قال: هذا مسكين، خسر كل افلوسه وحلاله بالبورصة.

يا ترى هل في مثله امثال؟

مع تحيات جيفرسون
لعي رسمت الابتسامة على شفاه أحد

بلد الخيرات

مذكرات جيفرسون

بلد الخيرات


ذاك اليوم قررت اروح ساحة الارادة

للمشاركة في المهرجان الذي اقيم بمناسبة

الاعتدائات الاخيرة على الفلسطينين في غزه

العدد كان كبير ومن مختلف الاطياف
كانت المتحجبه واقفة بجانب السفور
كان صاحب الدشداشه القصيرة واقف بجانب صاحب البنطلون اللو ويست
كان الشيعي واقف بجانب السني
كان الكويتي واقف بجانب الغير كويتي
الملتزم وغير الملتزم ، العلماني والاسلامي ، كان الكل يشارك

حتى الذي كان جالس في قهوة يوم البحار القريبة من المكان، كان ياكل باجيلا ويشارك

الخلاصة المشاركات كانت من جميع الاطياف، بس الحصالات كانت من جهة وحدة فقط.

وثاني يوم انظر في جرايدنا العزيزه وكأن تيار واحد هو الذي دعم وشارك في هذا المهرجان
ولم يذكر سوى الشيء اليسير هنا وهناك عن مشاركات من تيارات اخرى.


ثاني يوم رحت اتمشى الظهر على البحر
صفطت السيارة وقاعد اتطمش على الي رايح و الجاي
وكان في عمال نظافه قاعدين على واحد من الكراسي مثل الزرازير على حبل الغسيل
الظاهر قاعدين يدفون بعضهم البعض
شوي ولا اصفطت سياره كشخه
وانزلت منها سيده وريحت البخور فايحه منها على بعد كيلو
وعطت كل بنغالي يمكن ربع دينار اذا مو دينار
وارجعت سيارتها وراحت الله يرزقها ويزيد من خيرها

تعجبت وضحكت

شوي ولا سياره ثانيه فيها ثنتين
ونفس الشي نادوا العمال وعطوهم شي وراحوا
ولا اشوف العمال قاعد ياكلون
واحد ياكل براوني و واحد ياكل صمدي

هم تعجبت وضحكت

ما ادري البس بلسوت واروح كل يوم هناك
يمكن اسدد ديوني واعوض خسائر البورصه

و يمكن بعد وحده تسويلي بلاليط

مع تحيات جيفرسون
لعلي رسمت الابتسامة على شفاه احد

جيفرسون الى ميلان

جيفرسون الى ميلان

كنت رايح الى مدينة ميلان الايطالية
الرحلة كانت ممتازه و مريحه وكان اكثر الركاب ايطاليين
ولما وصلت الطياره فوق مدينة شيراز الايرانية دخلنا في عاصف قوية
الطياره المدنية صارت كأنها اف 16 من كثر ما لعبت فينا لعب
يمين فوق تحت يسار واصوات كأننا في حرب نووية
مو ناقص الا تقلب الطياره فينا فوق تحت
الناس قام تصارخ والمضيفات والي مفروض ما يبينون شي وجوههم انعفست
لااااااااااااااااااا زادت الحالة وصار البجي و النحيب والاجانب كل واحد شبق الثاني
التفت على الهندي الي يمي وقلت انسى لو شنو ما اشبقك
وبعد 10 دقايق هدأت الامور عقب ما طلعت روحنا وشفنا الموت
وعقب كل هذا الكئابه والحزن والبكاء والمشابق والهدوووووووووء
تبطل باب الحمام وطلع منه هندي واهوا يبتسسسسسسسم
ووقف بالممر متنح ويتلفت
الكل شافه وشوي قالت له المظيفه انت وين كنت؟؟!!!!
هز راسه وابتسم
والكل قام يضحك ونسينا كل الي صار ووصلنا ميلان بسلامه والحمد لله

مع تحيات جيفرسون

صج بغيت اموت بس هم لعي رسمت الابتسامة على وجه احد

حلاق الشباب

مذكرات جيفرسون

حلاق الشباب

رحت الحلاق قبل كم يوم
بس قلت خل أروح حلاق شوي مال شباب
ادلع روحي شوي
مليت من حلاق الفريج
ذبحني كل شمخ اكبر من الثاني
ولا ماعنده إلا فوطه وحده
ولازم كل مره يطلب مني واسطة
ياوده يجيب أخوه يا أمه يا خالة جدت عمته

المهم رحت الحلاق مال الشباب وقعدت
وما شاء الله دور وجدامي 4
قعدت مع الناطرين
وأشوف الحلاقين اشيسووون
هذا قاعد يصبغ، وهذا قاعد يحط جل، وهذا زلفه صار جنه فرجال

قلت بنفسي أنا وين جاي
أقوم احسن هلحلاق مايصلحلي

كان التلفزيون شغال وحاطين فلم مصري
قلت خل اندمج مع الفلم وأنسى الوضع
الشباب الي ناطرين عيونهم على الفلم
البطل يحب مرت أخوه
ومرت أخوه تحب ولد الجيران
وأخوه يحب وحده ثانية واهيا حامل منه
يعني فلم حده مسخره
والشباب عيونهم على التلفزيون وأنا معاهم ههههههه
المهم البطل تركته حبيبته وانحاشت مع رفيجها الجديد بسيارته الـ بي ام
واهوا لاحقهم بسيكل
القاري اسرع منه
ولا راعي الـ بي ام من صجه دايس
والشباب عيونهم على التلفزيون و أنا أطالع معاهم
راعي السيكل انقهر وقرر ينتحر
جان يجبل على سيارة جايه بوجهه ودعمها
جان يطييييييييييييييييييييييير بالهوى
المهم خلصنا؟ لا طبعا
البطل واهوا طاير شاف سيارةمجبله عليه
واهوا طاااااااااااااير
راعي السيارة المجبله شافه واهوا طاير
جان يطق له هرن
اهوا طقله هرن أنا فصلت من الضحك
جان أقول ليش يطق هرن يعني شسوي البطل يلف ويطيح منااك؟
وأنا ميت من الضحك
ولا واحد من الشباب قال
لا عمي هذا مو هرن
هذا السنسر اشتغل
هههههههههههههههههههههههههههههههههههه
ورب الكعبه مت عليه من الضحك
سلط الله على ابليسه
سنسر عاد؟
قمت احلق وأنا اضحك ومن الضحك صار بويهي 35734 جرح

وصارت علاقتي بالحلاق فللي

مع تحيات جيفرسون
لعلي رسمت الابتسامة على شفاه احد

مطعم دهن

كنت حدي متضايق

السوق صاير احمر مثل عيون خدامتنا

المجلس امراقع مثل اعيال الفريج الي قاعدين عند الفرع

الجرايد اخبارها تلوع الجبد

مع كل هلظروف يطلعلي اخوي الصغير بطلعه

قال لي:

اخوي جيفرسون اشرايك تريقني؟

خير اريقك؟

اي تريقني

اقول ناد الخدامه وخلها تسويلك بلاليط يالله فارج

اشدعوه اخوي خل نروح نتريق بره

ها بره؟ يعني؟

اي يالله فوقه الجو حلو يالله جيفرسون يمكن تكتب لك مذكره

انزين بتروح اي مطعم؟

قال هذا الي على البحر

إي أي واحد اشكثرهم؟ شسمه؟

قال ما ادري بس اسمه فيه دهن

دهن؟؟!!!

قال ايه

طلعنا من البيت ومرينا دوار الجوازات باتجاه دوار البدع

مرينا مطعم مطعم من الدانه لي شاي ونعناع

ماكو شي

متأكد اسمه فيه دهن

قال ايه دهن الي يحطونه بالسلطه

يحطونه بالسلطه هذي معلومه يديده

هذا ما يسمونه دهن يسمونه زيت

قال ايييييييييييييييييييي زيت صح صح

قلت انت لي متى ما تتعلم صار لنا ساعة نفتر بالشوارع

صار الضحى

الكل راح دوامه

وانت قاظبلي دهن دهن

يسمون هالمطعم زيت وزعتر فهمت؟

قال اييييييييييييييه يلا نروح

قلت له مالك امل

تكفى اخوي يوعان

كسر خاطري

رحنا صفيت الموتر ولا اشوف المواقف مقبطه

يا ماعندهم دوامات؟

رحت المطعم ولا اهواش على الطاولات

نطرنا شوي وحصلنا طاوله

الي على يميني تقول حق رفيجاتها قلت حق الناظرة عندي مراجعة امراض نسا و جيتكم

والي قبالي تقول توني صابغة شعري و بطلع اكشخ فيه

والي وراي اسمعها تتكلم بالتلفون عدال عدال وتقول ما عندي رصيد دزلي

اكل اخوي وشبع

ورجعنا البيت

فتحت التلفزيون ولا المذيع يقول ازمة تلوح بالأفق

انا لله وانا اليه راجعون

راحت الكويت بين ناس كيرلس وبين ناس يوزلس

مع تحيات جيفرسون

لعلي رسمت الابتسامة على شفاه أحد

بوفانيله حمرا

مذكرات جيفرسون

بوفانيله حمرا

الصيف الي فات رحت ماليزيا انا واخواني
قالوا لنا الناس لا تسكنون مني ولا مناك
غير فندق برجايا تايم سكوير لا تدور
حجزنا ورحنا ماليزيا
وصلنا الفندق
وياريتنا ما وصلنا
اهي اشكال غريبه!
اهي نماين من الناس
يعني صدقوني انا مو من عادتي اتطنز على الناس
بس لما شفت واحد خليجي
لابس فنيله حمره ام علاق بالفندق
بصراحه انصدمت
قلت يالله نطوف
شوي مرو بنات جدامه الله يستر عليهم
لابسين عبيهم ويايين من السوق
عبيهم لها ذيل مثل نفنوف العروس
اطالع ولا اغبره تحت بالعباية
ولاصق علوووج
ومتعلق بطل ماي بالعبايه ويسحب وراهم
افر ويهي على بوفانيله حمره ام علاق
ولا الأخ يوم شاف البنات
قاعد يلعب بشعر صدره
يكون اغراء يعني
هذا كله صار واحنى تونا واصلين وعند الرسبشن
صعدنا الغرفه
الله يزيد النعمه
وكل واحد انسدح على سريره
وقاعدين نطالع الديكور
جان يقول واحد شفتو بوفانيله حمره
اهوا قال بوفانيله حمره
واحنا هع هع هع لي الصبح
اثاري الكل كان منتبه
سلمكم الله
نمنا
ولما صار موعد الافطار
نزلنا المطعم ولا بوفانيله حمره لابس فانيله صفره
وما خذ صحن من المطعم حاط فيه اندومي وموديه الغرفه
احنا شفناه متنا عليه من الـ هع
واحد قاله وين اخوي رايح مني المطعم
واحد قاله اخوي وين فنيلتك الحمرا ترها احلى عليك
اخوي الثالث قال له الله شهل الشعر الي بصدرك تقول ليفه
اهوا قال ليفه
احنا والمطعم والبنات والصبيان والعيايز كلنا هع هع هع

مسكين حزتها بس عرف ان فيه شي غلط

طبعا قررنا بنفس اليوم نغير الفندق

بس قالوا اخواني على الاقل خل نطب حمام السباحه
رحنا الحمام ولا يمكن فيه 1000 واحد خليجي
قلت لهم شلون بتسبحون من صجكم؟
شوي ولا بوفانيله صفره ياي
بس هلمره بدون فانيله
طرق الصروال (قصدي الشورت)
جان يطب بالحمام
اهوا طب
جان تطلع بقعه بالماي زرقه و فيها الوان الطيف
شوي ولا ولا واحد بالحمام الكل طلع وتم بروحه يسبح
احنا طحناله هع هع هع
ومشينا عنه
وعلى فكره كان لون الشورت اخضر فسفوري
مكتوب عليه من ورى LOVE
عقبها قررنا ما نروووح ماليزيا
بسبت بوفانيله حمرا

مع تحيات جيفرسون
لعلي رسمت الابتسامة على شفاه احد

انصت يحبك الآخرون

مذكرات جيفرسون

انصت يحبك الآخرون

قرأت في كتاب ان من ينصت يحبه الناس، وقررت ان اختبر ما قرأته مع احد الاشخاص
ياترى من اختار؟
من الشخص الذي لا اعرف عن مشاكله ولم انصت له يوما من الايام؟
بحثت هنا وهناك
واخترت اختي الصغيرة ذات الـ 14 عام

الآخ: مرحبا اختي
الأخت: هلا بحبيبي اخوي
شلونك اخوي؟
تسلم لي هالابتسامه انشاء الله دوم يا رب
الأخ: من زمان ما سولفت وياج اختي، شخبارك شعلومك ولا كأننا في بيت واحد
الاخت: الحمد لله انا بخير مشغوله بالهدراسة
الاخ: الله يسهل عليج
اقول: سامعه عن يرنامج اسمه استار اكادمي؟
الاخت: بييييييييييييييييييييييه شخبار؟ اي اعرفه
الاخ (متعجب جميع قنوات استار اكادمي ملغية): صج والله عبالي ما تعرفين عنه شي، انزين ممكن تقولين شنو هذا البرنامج؟
الاخت: شوف اخوي
وقامت تسرد الاخت كل ما تعرفه عن البرنامج
وعن ما يقال عنه بالمدرسة
وعن المدرسة
وصديقات المدرسة
والابلات
والبويات
وسوالف البويات
ومحاولات البويات
وعدد البويات
واسماء البويات

وانا انصت متعجبا

ورفيجات البويات
وزواج البويات
وطلاق البويات
وزعل البويات

وانا انصت
و
و
و
و
كل هذا وانا انصت
عجيب فن الانصات
ولكن بعض الذي قالته رفع ضغطي
عصبت من الداخل
ولكن لو بينت ذلك لها لانقطع الارسال وتوقف كل شيء
تحملت لابعد الحدود
الاخت: اخوي القعده وياك ما تنمل وانا وايد انشرح صدري واتمنى تتكرر القعده وياك بروح اكمل دراستي
الاخ: الله يسهل عليج اختي حبيتي واذا تبين مساعده بس اشري

بييييه هكذا كنت بيعد عنها
هكذا الانصات له سحر كبير على النفوس
هل صحيح ما يقال
انصنت يحبك الآخرون؟
انتظر تعليقاتكم

مع تحيات جيفرسون
لعلي رسمت الابتسامة على شفاه احد