كنت حدي متضايق
السوق صاير احمر مثل عيون خدامتنا
المجلس امراقع مثل اعيال الفريج الي قاعدين عند الفرع
الجرايد اخبارها تلوع الجبد
مع كل هلظروف يطلعلي اخوي الصغير بطلعه
قال لي:
اخوي جيفرسون اشرايك تريقني؟
خير اريقك؟
اي تريقني
اقول ناد الخدامه وخلها تسويلك بلاليط يالله فارج
اشدعوه اخوي خل نروح نتريق بره
ها بره؟ يعني؟
اي يالله فوقه الجو حلو يالله جيفرسون يمكن تكتب لك مذكره
انزين بتروح اي مطعم؟
قال هذا الي على البحر
إي أي واحد اشكثرهم؟ شسمه؟
قال ما ادري بس اسمه فيه دهن
دهن؟؟!!!
قال ايه
طلعنا من البيت ومرينا دوار الجوازات باتجاه دوار البدع
مرينا مطعم مطعم من الدانه لي شاي ونعناع
ماكو شي
متأكد اسمه فيه دهن
قال ايه دهن الي يحطونه بالسلطه
يحطونه بالسلطه هذي معلومه يديده
هذا ما يسمونه دهن يسمونه زيت
قال ايييييييييييييييييييي زيت صح صح
قلت انت لي متى ما تتعلم صار لنا ساعة نفتر بالشوارع
صار الضحى
الكل راح دوامه
وانت قاظبلي دهن دهن
يسمون هالمطعم زيت وزعتر فهمت؟
قال اييييييييييييييه يلا نروح
قلت له مالك امل
تكفى اخوي يوعان
كسر خاطري
رحنا صفيت الموتر ولا اشوف المواقف مقبطه
يا ماعندهم دوامات؟
رحت المطعم ولا اهواش على الطاولات
نطرنا شوي وحصلنا طاوله
الي على يميني تقول حق رفيجاتها قلت حق الناظرة عندي مراجعة امراض نسا و جيتكم
والي قبالي تقول توني صابغة شعري و بطلع اكشخ فيه
والي وراي اسمعها تتكلم بالتلفون عدال عدال وتقول ما عندي رصيد دزلي
اكل اخوي وشبع
ورجعنا البيت
فتحت التلفزيون ولا المذيع يقول ازمة تلوح بالأفق
انا لله وانا اليه راجعون
راحت الكويت بين ناس كيرلس وبين ناس يوزلس
مع تحيات جيفرسون
لعلي رسمت الابتسامة على شفاه أحد
هناك ٣ تعليقات:
شهيتني
ضوقه حلو اخوك
صباح الخييييييييييييير
دهن عااااااد
بس تبي الصج ....
عنده ذوق
آنه رحت حق المطعم الي يمة ...
نسيت شنو أسمة الحين
خرطي ...
فعلا ... أخرطي
وناس طق مطاااطق على .. زعتر ودهن .. أقصد زيت
عنده ذوق .. صغيركم :)
س : الي طايغه شعرها ؟ ..ما قالت بأي صالون ؟
looooooooooool
والله انا قبل ما تقول زعتر وزيت
عرفت انه هو
لان ما في مطعم اسمه في زيت الا هو!
تدوينه جميله:)
إرسال تعليق