الأربعاء، ١٥ فبراير ٢٠١٢

مذكرات جيفرسون في المعتقل

مذكرات جيفرسون في المعتقل

في يوم من الأيام كنت رايح السوق
ما أروح؟
رحت

وانا اتمشى وقفت عند محل يبيع اجهزة قديمة مستعملة (سكراب)
ولفت نظري جهاز غريب عجيب.
سألت البياع شنو هذا؟!!
قالي والله ما أدري
قلت إلا بشتريه
و اشتريت الجهاز واخذته البيت معاي وحطيته بورشتي المتواضعه.

وبعد جم يوم قعدت انظف الجهاز من الغبار وبعد التنظيف ظهرت لي لوحة فيها اسم الجهاز وتعليمات التشغيل.

وانصدمت لما قرأت اسم الجهاز "آلـــــــــة الزمـــــــن"!!!!
قلت الا بجربها
واتبعت الخطوات
بس احترت اي تاريخ اختااااار
امممممم
امممممم
فاخترت تاريخ ٢ أغسطس ١٩٩٠ (سنة الغزو)
وفعلا حطيت التاريخ وضغط على زر Start....

فجأة وجدت نفسي في مكان قليل الاضاءة
اسمع فيه اصوات نحيب وبكاء وعويل....
المكان كأنه معتقل
الاصوات كانت لرجال ونساء
الرائحة كانت مغززة جداً

كنت امشي بالمعتقل بين الزنزانات

و وقفت عند الزنزانة الأولى:
نظرت بين قضبان الزنزانه
لقيت شاب في مقتبل العمر
سألته انا وين؟
ضحك ضحكه وكأنه يقول والله حااااله شوف السؤال
وقال لي انت في معتقل كويتيين لدى القوات العراقية
قلت له اووووخ لا يحوووشك من صجك؟؟!!!
رد علي اي والله
ليش شفيك؟ خايف؟
قلت له بصراحه اي
قلت له انت شيعي؟ فضحك ضحكه من قوتها خفت حراس السجن يكتشفوني
رد علي: يبا اي شيعي واي سني ؟ اهو العراقيين يفرقون بين شيعي وسني؟
ما يفرقــــــــون. روح روح خلني انسدح ابرك لي.

الزنزانه الثانية:
لقيت فيها شايب
لهجته مكسرة
سلمت عليه شلونك حجي؟
رد علي انا بخييير يا ولدي ولا تحاتي ترا بتتحرر الكويت غصباً على هالظلام.
قلت له حجي وط صوووتك لا يسمعونك ترا والله يذبحونك
رد علي خل يولووون اردى منهم مافي!!!
سألته حجي انت عيمي؟ لهجتك تقول جذيه
عصب علي وقال انا كوييييتي وحكامنا آل الصبااااح

خفت ازعله اكثر فتركته ومشيت.

الزنزانة الثالثة:
لقيت فيها رجل لاف راسه بشماغ احمر
قربت منه وسلمت عليه
رد علي السلام وقالي يا هلا بولدي
وقال اسمحلي يابوك ما عندي اقهوه اضيفك فيها
قلت لها لا عمي عادي. محتاج شي عمي؟ تشتكي من شي؟
رد علي لا يبوك. الشكوى لرب العالمين
قلت له حجي انت من اي قبيلة
وقف على حيله واهو معصب واحمر وجهة وقالي انت ما تستحي؟
حنا كلنا كويتيين وشهالهرج اللي انت تقوله؟

لا تقول سني ولا شيعي ولا احضري ولا بدوي بس قول كويتي اها

قلت له عمي لا تلومني
هذا كلامهم بساحة الارادة وبالجرايد والقنوات

ردوا علي كل اللي في الزنازنات: شنو هذي ساحة الارادة؟

وقفت محتار
شقول لهم
واهم ناطرين تحرير الكويت
اقولهم ان بساحة الارادة تعرضوا للاسرة الحاكمة؟
اقولهم ان قاموا يساومون على الكويت؟
اقولهم ان بعض الرموز تاخذ تعليماتها من الخارج؟
اقولهم ان صرنا نفرق بين السني والشيعي وقمنا نكفر بعض؟
ولا اقولهم عن البدو والحضر وشلون واحد يعيب على اصل الثاني؟

ما قدرت ارد عليهم
سحبت نفسي شوي شوي
ورجعت لآلة الزمن وضغط زر العودة
ورجعت اكتب لكم مذكراتي قبل لا انساها



شكراً لكل قرأ مذكرتي
شكراً لكل من اعتبر
شكراً لكل من نشر

واعتذر عن الاسلوب الركيك بس لاني جيفرسون فما علي شرهة

تحياتي
@jefersonq8

ليست هناك تعليقات: